कांग्रेस पदका उम्मेदवार तिलक राई आफुले जितेपछि नगरपालिकाको बेथितिलाई बाहिर ल्याउने



धरान  । नेपाली कांग्रेसबाट मेयर पदका उम्मेदवार तिलक राईले आफुले जितेपछि नगरपालिकामा भएको बेथितिलाई बाहिर ल्याउने प्रतिवद्धता जनाएका छन् ।

बुधबार उम्मेदवारी मनोनयन दर्ता गरेपछि राईले पत्रकारहरुसँग प्रतिक्रिया दिदै यस्तो प्रतिद्धवता जनाएका हुन् । उनले नगरपालिकाप्रति जनतामा अविश्वासको श्रृंखला बढेको र प्रशासनिक बेथिति पनि चुलिएको बताए । नगरको थुप्रै आयोजनाहरु अधुरो भएको र खानेपानी जस्तो महत्वपुर्ण योजनामा समेत हेलचेक्र्याइ भइरहेको उनले आरोप लगाए ।

‘नगरको आयोजनाहरु पुरा भएको छैन । खानेपानी जस्तो महत्वपुर्ण आयोजनामा समेत हेलचेक्रयाई गरेर आफु अनुकुल सञ्चालन गर्ने प्रयास भइरहेको छ । त्यसलाई रोक्न खोजिरहेका छौ,’कांग्रेस उम्मेदवार राईले भने,‘बाटोघाटोको समस्या उतिकै छ । भौतिक पूर्वाधारको कुरामा थुप्रै अनियमितता भएको आशंका छ । मेरो उम्मेदवारी त्यो सबै जनताको आशंकालाई भोली यथार्थमा बाहिर ल्याउने पनि प्रतिवद्धता हो ।’

कांग्रेसका नगर सभापति समेत रहेका राई २०७४ को पहिलो स्थानीयतह निर्वाचनमा पनि उम्मेदवारी दिएका थिए । त्यसबेला उनी तत्कालिन एमाले उम्मेदवार तारा सुब्बासँग पराजित भएका थिए । उनले त्यसबेला ट्रायलकोरुपमा उठेको र यसपाली जित्ने गरी उम्मेदवारी दिएको दाबी गरे । ‘त्यो बेला ट्रायल थियो । यसपाली जित्छु । जित्ने अभियानमा छुँ,’उनले भने,‘धेरै अन्तर त होइन तर, यसपाली १५ सयदेखि २ हजार मतले जित्नसक्ने स्थिति छ ।’ उनका अनुसार कांग्रेसले न्युनतम २८ हजार र २९ देखि ३० हजारको बीचमा मत ल्याएर जित्ने बताए ।

यसपाली युद्धस्तरमा जनताको घरमा पुगेर शुभेच्छा लिइरहेको बताउदै उनले जनताको आकांक्षा पुरा गर्ने प्रतिवद्धता व्यक्त गरेकोले पनि मत पाउने विश्वास व्यक्त गरे । ‘जनताले हुने कुरा माग्नुभएको छ, नहुने कुरा माग्नु भएको छैन । हिजोको साथीहरुले हुने कुरा पनि पुरा नगरेको हुनाले अब हुने कुरा पुरा गराउने पार्टी र प्रतिनिधि छान्न चाहनु भएको छ,’उनले भने,‘त्यसमा उहाँहरुको रोजाईमा नेपाली कांग्रेसको उम्मेदवार तिलक राई परेको भन्ने वडा, टोलमा जनताबाट कुरा आइरहेको छ। त्यसैले जनताको मत, विचार र शुभेच्छाबाट जित्ने आधार मेरो हो ।’

उनले नेकपाबाहेक सबै दलहरुसँग सहकार्य हुने पनि दाबी गरे । अन्य दलले उम्मेदवारी दर्ता गरेपछि फरक नपर्ने बताए । ‘उम्मेदवारी दिए पनि मत हाल्ने कुरा हो । फरक पर्दैन, समझदारी भइसकेको छ,’उनले भने ।

सम्बन्धित समाचार